Neies aus Dheise
So Leide und Leidinnen, ich widder.
De Feierlichgeeden sinn nu endlich rumm. Nu will ich euch moa erzähln, was se frieher alles uff de Beene jeschdelld hamm, bevor der Weihnachdsmann jegumm iss.
Schdolln baggen, das woar immer anjesoad. Woar werglich harde Arbeed. De Weibsen mussden den Deeg gneden, doa mussde gans scheene Murre jehabd hamm. De Männer hamm oh jehulfen, aber mehr beim Jeschdelle baun. Zu Osdzeiden, goabs nich moa de Zudaden fürn Schdollen. So was Schnidelfedsiches wie Zidronad, Orangad unn oh Mandeln, goabs nich immer. De Fraun mussden sich was einfalln lassen. Gliegg hudde, wer im Wesden de buggliche Hoobe hudde, unn enn Wesdbäggchen jegrichd had.
In Dheise hudden wir das Gligg, dass mer „Gugens“ Bäggerei hudden und die woar sehre gud. Herr Guge hat forsch ganze Dorf jebaggen. Nich bloß Schdollen nee, oh Blechguchen zu de Jugendweihe oder Hochzeid. Aber oh de Brodchen uns Brod woarn schunn sehre gud.
Nu widder zerigg zum Schdolln baggen. Wenn der Deeg ferdich woar, had Vadder de Jeschdelle foarn Schlidden oder Handwon zusamm jeschusderd.Oh de Schdollnbreddchen durfden nich fehln, doa goam der Nome druff und das Schild goam in de Schdolle, domid oh Jeder seine jegrichd had. Die woarn aus Holz zusammjeschusderd. De Weibsen hudden joa undernander oh noch een heimlichen Weddbewerb, wer de beste jebaggen hudde. Schliff durfdese nich hamm und die hab ich grode gerne schnabulierd. Wenn der Deeg ferdich woar, sinn de Kinder losjejaggd midn Schlidden oder Handwon und hamms bei Gugens abjegehm. Gugens hamm denn jesohd, weense ferdich iss.
Eenmoal woarn de Schdollen so groß jewordn, dass se nich mehr ins Jeschdelle jebassd hamm. Das woar schunn gomisch, unn mer hamm uns echd de Fernzie zerbrochen, bis mer midjegrichd hamm, dasses der falsche Schlidden woar. Das woarn Schbass. Heeme wurde der Schdolln denn noch jebudderd und jezuggerd unn denn, in de Schlofschdubbe uffn Gleederschrang jelehd.
Das Ende vonns Lied, von Weihnachden bis bahle Osdern goabs Schdolln! Bloss Osdern mussde man de Schdolle meesdens schunn didschen. Gann heide noch nich rann … an de Schdolln, unn meesdens hamm mer oh nurn Ganden jegrichd, de Schdollnbemmen woarn forn Besuch jedachd.
So das woars widder von de
ahle Debbern
Text & Fotos: toeschwa
